د هېواد په قیمتي او نیمه قیمتي ډبرو د پانګوونې د راجلبولو په موخه د کانونو او پټرولیم وزارت هڅې
د کانونو او پټرولیم وزارت مالي او اداري مرستیال، ښاغلي محمد حمید یوسفي نن ماسپښین د افغانستان په قیمتي او نیمهقیمتي ډبرو د پانګوونې د فرصتونو په هکله د (Gem Stone) کمپنی له استازو سره د ويډیو کنفرانس له لارې په داسې حال کې خبرې وکړې، چې د کانونو د کاډسټر عمومي رئیس او د چارو ادارې د پانګوونې اسانتیا واحد استازو پکې ګډون کړی وو.
په دې ناسته کې، د یاد شرکت استازو لومړی د خپلو فعالیتونو په اړه معلومات وړاندې کړل او په افغانستان کې د پانګوونې په برخه کې د خپلو اندیښنو د څرګندولو ترڅنګ، په افغانستان کې د قیمتي ډبرو د پروسس مرکز د جوړولو لپاره خپل چمتووالی اعلان کړ.
د کانونو او پټرولیم وزارت مالي او اداري مرستیال د افغانستان په قیمتي او نیمهقیمتي ډبرو د پانګوونې فرصتونه معرفي او په اړه یې داسې وو ویل: د کانونو او پټرولیم وزارت د پانګوونې اسانتیا لپاره د قانوني اسانتیاوو د چمتو کولو ترڅنګ د غیرقانوني استخراج د مخنیوي لپاره یې کار روان دی.
د غونډې په پای کې تصمیم ونیول شو، چې (Gem stone) کمپني به کابل ته راځي او د قیمتي او نیمهقیمتي ډبرو د پانګوونې په هکله به خپل سوداګریز پلان وړاندې کړي، ترڅو د هېواد عایدات زیات او د دندو فرصتونو ته زمینه مساعده شي.
