د پاليسۍ او برنامو مرستیال د افغانستان او ترکيې ترمنځ د سوداګریزو اړیکو مسوول سره ولیدل

د کانونو او پټرولیم وزارت د پاليسۍ او برنامو مرستیال شيخ الحديث مولوي عبدالرحمن قانت د ۱۴۰۴ هـ. ش کال د ثور په ۸مه نېټه له ښاغلي الحاج فاتح چایاباتماز د افغانستان او ترکيې ترمنځ د سوداګریزو اړیکو مسوول، نورالدین ارزروم د دانګه ګروپ رئیس او مل پلاوي سره وکتل.
په پیل کې ښاغلي فاتح په ټول افغانستان کې د امنیت له ټینګښت څخه د خوښۍ څرګندونه وکړه او ویې ویل: د اسلامي امارت له راتګ سره ډېر کارونه د اقتصادي پرمختګ او پانګونې په برخه کې، په ځانګړي ډول د کانونو په سکټور کې ترسره شوي دي، دغې چارې نړیوال پانګوال هڅولي دي، چې د افغانستان په بېلابېلو برخو کې پانګونه وکړي. نوموړي زیاته کړه چې دوی غواړي د هېواد د کاني سرچینو په ځانګړي ډول د نفتو او سرو زرو په برخه کې پانګونه وکړي، د وزارت له مشرتابه یې وغوښتل چې د لازمو اسانتیاوو په برابرولو کې ورسره مرسته وکړي.
د پاليسۍ او برنامو مرستیال د دوی د لیدنې څخه د خوښۍ څرګندونه وکړه ویې ویل: اسلامي امارت په افغانستان کې د هر ډول پانګونې زمینه برابره کړې ده ټول ملي او نړیوال پانګوال کولای شي چې د هېواد په بېلابېلو برخو کې پانګونه وکړي. نوموړي دا هم زیاته کړه چې د کانونو او پټرولیم وزارت مشرتابه به د پانګوالو لپاره د لازمو اسانتیاوو برابرولو کې هېڅ راز هڅه او زیار ونه سپموي.