محمد هارون چخانسوري: د افغانستان اقتصادي رفاه، ټولنیز پرمختګ، د منابعو څخه موثره استفاده او ددې بیرغ تر سیورې لاندې د افغانانو ګډ ژوند زمونږ لپاره مهم ارزښتونه دي
د کانونو او پټرولیم وزارت نن سهار د ملي بیرغ ورځ د یو لړ مراسمو په ترڅ کې ونمانځله. دغه مراسم چې د وزارت په انګړ کې ترسره شول، د کانونو او پټرولیم وزارت سرپرست محمد هارون چخانسوري، د وزارت معینانو او کارکونکو په کې ګډون درلود.
د کانونو او پټرولیم وزارت سرپرست محمد هارون چخانسوري په خپله وینا کې وویل: د افغانستان اقتصادي رفاه، ټولنیز پرمختګ، د منابعو څخه موثره استفاده او ددې بیرغ تر سیورې لاندې د افغانانو ګډ ژوند زمونږ لپاره مهم ارزښتونه دي. مونږ باید ددې بیرغ د برم د ساتلو لپاره خپل مکلفیتونه په سمه توګه ترسره کړو او ددې بیرغ د عزت او وقار د ساتلو لپاره لاس په کار شو.
محمد هارون چخانسوري د افغانستان د ملي امنیتي او دفاعي ځواکونو له سرښندنو څخه د قدردانۍ ترڅنګ وویل: موږ باید ژمنه وکړو چې د کانونو سکتور په یوه عایداتي، شفاف او ځواب ویونکي سکتور بدل کړو ترڅو کاري فرصتونو او اقتصادي پراختیا او ملي هوساینې ته زمینه مساعده شي.
د غونډې په پای کې د کانونو او پټرولیم وزارت سرپرست محمد هارون چخانسوري او د وزارت د رهبري هیئت او کارکونکو د وزارت په انګړ کې د افغانستان ملي بیرغ د پورته کولو مراسم ترسره کړل
