محمد هارون چخانسوري: د څواړخیزه ګروپ موخه باید د استخراجي صنایعو د روڼتیا نوښت په نړیوال سازمان کې د افغانستان د غړیتوب ساتنه وي
د کانونو او پټرولیم وزیر محمد هارون چخانسوري په مشرۍ د څو اړخیزه ګروپ (MSG) ۵۱مه غونډه ترسره شوه. په دې غونډه کې د افغانستان د استخراجي صنایعو د روڼتیا نوښت AEITI د اووم راپور د تایید سربېره په ګروپ پورې اړونده نورو مهمو موضوعاتو په اړه بحث وشو.
د کانونو او پټرولیم وزیر محمد هارون چخانسوري د ګروپ غړو ته د ښه راغلاست ترڅنګ وویل: دا غوڼډه د دې لپاره راغوښتل شوې چې راپور پر وخت منظور او خپور شي، د ګروپ د غړو نظریات واوریدل شي او د ارزولو په پایله کې یې پریکړه ترسره شي.
هغه زیاته کړه: د اړونده کاري ګروپونو څخه مو هیله ده چې د EITI پر هغو فورمو ژر تر ژره کار شروع کړي چې د اعتبار ورکړې د راتلونکې پروسې او راپورونو لپاره اړین دي ترڅو په راتلونکو پروسو کې د ځنډ مخنېوی وشي.
په غونډه کې د اووم راپور د نهایي کولو، د اتم راپور د تهیه کولو پر پلان، د وظایفو د لایحې او اړونده فورمو د ډکولو او د بدیلو غړو د معرفي کولو په اړه بحث وشو.
د غونډې په پای کې د کانونو او پټرولیم وزیر محمد هارون چخانسوري د ګروپ د غړو له فعال ګډون څخه د مننې ترڅنګ لاندې وړاندیزونه وکړل:
• د روڼتیا تامین زموږ د ټولو مسئولیت دی او په دې برخه کې باید د ګروپ هر غړی خپل مسئولیت ادا کړي
• هغه غړي چې په غونډو کې غیرحاضري کوي، نوم او مشخصات به یې خپریږي
• هغه غړي چې په متواتر ډول په درې جلسو کې غیرحاضري لري،د وظایفو د لایحې او عملیاتي پروسیجر پر بنسټ له ګروپ څخه ایستل کیږي
• د مالیې له وزارت سره دې د تصدیانو د مالی حسابونو د صورت تفتیش تعقیب شي
• راتلونکې اوونۍ دې د لومړۍ کاري کمیټې غونډه ترسره شي ترڅو د جون تر وروستۍ نېټې د اووم راپور د نهایي کولو لپاره جدي اقدامات ترسره شي.
