د ۱:۱۰۰۰۰۰ مقیاس جیولوجیکي نقشې اخیستنې عملي چارې په درېیو زونونو کې پیل شوې
د کانونو او پټرولیم وزارت د سروې او جیولوجي معینیت اړوند د کانونو د سروې او اکتشاف عمومي ریاست د پنځه کلن کاري پلان له مخې، د ټول هېواد د ۱:۱۰۰۰۰۰ (یو په نسبت د سل زره) مقیاس جیولوجیکي نقشې اخیستنې پروژه سږ کال د شته امکاناتو، تجهیزاتو او مسلکي پرسونل په پام کې نیولو سره، په درېیو جنوبختیځ، جنوب او لوېدیځ زونونو کې عملاً پیل شوې ده.
د یادې پروژې په لړ کې د هېواد د جنوبختیځ زون د سروې تخنیکي ټیم، د کانونو د اکتشاف رئیس دیپلوم انجنیر عبدالمتین عابد په مشرۍ ترسره کېږي.
یاد تخنیکي ټیم د پکتیکا ولایت، په پلان شوې ساحه کې د جیولوجیکي سروې او نقشې اخیستنې عملي چارې پیل کړې.
د دې پروژې په ترڅ کې به د سیمو جیولوجیکي جوړښتونه، د ځمکې د جوړښت ځانګړتیاوې او د کاني زېرمو احتمالي ساحې په مسلکي او تخنیکي ډول وڅېړل شي، څو د هېواد د کاني سرچینو په اړه لا بشپړ او باوري معلومات راټول او په معیاري جیولوجیکي نقشو کې ثبت شي.
د یادې پروژې له پلي کېدو سره به کاني سیمې له غیرکاني سیمو څخه تفکیک شي، چې له مخې به یې د کاني سیمو د اقتصادي وړتیا د معلومولو لپاره لا کره او تخصصي سروې او اکتشافي څېړنې ترسره شي.
همدارنګه، د ۱:۱۰۰۰۰۰ مقیاس جیولوجیکي نقشو برابرول به د هېواد د کاني سرچینو د پېژندنې، د راتلونکو سروې او اکتشافي فعالیتونو د پلان، د پانګونې لپاره د بالقوه کاني ساحو د تشخیص او د وخت، امکاناتو او مالي سرچینو د اغېزمنې ګټې اخیستنې په برخه کې به مهم بنسټ برابر کړي.
د کانونو د سروې او اکتشاف عمومي ریاست هڅه کوي، چې د شته امکاناتو په چوکاټ کې د یاد پنځه کلن کاري پلان له مخې د هېواد د بېلابېلو سیمو جیولوجیکي معلومات راټول او معیاري نقشې چمتو کړي، څو د افغانستان د کاني سرچینو د لا ښه پېژندنې او مسلکي مدیریت لپاره لازم معلوماتي بنسټ رامنځته شي.
