د افغانستان او چک جمهوریت چارواکو د دواړو هیوادونو ترمنځ د سوداګرۍ او پانګونې په اړه ناسته ترسره کړه
په دغه ناسته کې د افغانستان د کانونو او پټرولیم وزیر محمد هارون چخانسوري، د صنعت او سوداګرۍ وزیر نثار احمد فیضي غوریاني، د پانګونې اسانتیا واحد عمومي رییس عطاالله نصیب، د ملي تداروکاتو عمومي رییس کبیر عیسی خېل او افغانستان سفیر شهزاد ګل اریوبي د افغان - چک - سلواک سوداګرۍ او پانګونې تر عنوان لاندې د چک جمهوریت له چارواکو سره، په دوه ورځنۍ ناسته کې ګډون وکړ.
د کانونو او پټرولیم وزیر په افغانستان کې د شته کاني منرالو او کاني زیرمو په اړه د یادې ناستې ګډونوالو ته د مفصلو معلومات د وړاندې کولو ترڅنګ، وو ویل: په افغانستان کې د تریلیونو ډالرو په ارزښت د کانونو او هایدروکاربنونو په برخه کې کاني زیرمې لرو، او پدې برخه کې یې د چک جمهوریت له دولت او خصوصي سکتور له پانګوالو وغوښتل؛ ترڅو د افغانستان د کاني سکتور په شته فرصتونو پانګونه وکړي.
ښاغلي چخانسوري وویل، چې چک جمهوریت پخوا په افغانستان کې د هرات د سمنټو فابریکه درلوده، چې په یاده برخه کې یې د پام وړ فعالیتونو له امله تر اوسه پورې په ښه نوم یادیږي، او افغانستان غواړي چې په یاده او ورته نورو برخو کې د چک دولت او خصوصي سکتور پانګوونه راجلب کړي.
همدارنګه محترم وزیر د خپلو خبرو په ترڅ کې د شته فرصتونو ترڅنګ، په یاد سکتور کې د قانوني اصلاحاتو او د الکترونیکي یا ډیجیټلي سیستم د پروسې په اړه چې په افغانستان کې د پلي کیدو په حال کې دي، په ځانګړي توګه په کانونو او پټرولیم وزارت کې په ازمایښتې ډول پکار اچول شوي، معلومات وړاندې کړل.
د ناستې په پای کې، د کانونو او پټرولیم وزارت وزیر د چک جمهوریت له کوربتوب څخه د مننې ترڅنګ، وو ویل چې افغان حکومت هیله لري، ترڅو په ګډه توګه د افغانستان د صنایع استخراجي سکتور له لارې، چې د افغانستان په پرمختګ کې رغنده رول لوبوي، د هېواد پرمختګ ته لاره هواره کړي.
