د هرات ولایت د مالګې کان تړون لاسلیک شو
د کانونو او پټرولیم وزیر الحاج ملاهدایت الله بدري د ۱۴۰۵ لمریزکال د چنګاښ میاشتې په ۱۶مه نېټه د هرات ولایت د غوریانو ولسوالۍ د نمکسار سیمې د مالګې د اول بلاک تړون، چې ۱۰.۲۴۱۱۴ کیلومټره مربع مساحت لري د(۳۱۵,۵۹۴,۰۰۰) درې سوه پنځلس میلیونه، پنځه سوه څلور نوي زره افغانیو په پانګونې سره، د اسماعیل شیرزاد عزیزي د کان کیندنې او پروسس شرکت سره لاسلیک کړ.
د کانونو او پټرولیم وزیر د یاد کان د تړون د لاسلیک پرمهال وویل: د دې کان تړون د هر ټن په بدل کې د ۱۵۰۰ افغانیو رویالټي په ټاکلو سره د پنځلسو کلونو لپاره لاسلیک کېږي، دغه راز به نوموړی شرکت خپلې ټولې چارې په تړون کې د شویو ژمنو او د کانونو د قانون او کړنلارې سره سم ترسره کوي.
د یادونې وړ ده چې یاد شرکت به د رویالټي د ورکړې تر څنګ، د ټولنیزو خدماتوپه بېلابېلو برخو کې ۵۰۰۰۰۰۰ افغانۍ لګوي سربېره پردې به په دغه پروژه کې ګڼ شمېر هېوادوالو ته په مستقیم او غیر مستقیم ډول د کار زمینه برابره شي.
