د کانونو او پټرولیم وزارت دوه تنه نوي رئیسان معرفي شول
ښاغلی ډیپلوم انجنیر محمد خلیل د اسلامي امارت د پالیسۍ اړوند د ازموینې له پروسې څخه وروسته د ازادې سیالۍ له لارې د جیو فزیک د سروې او څېړنې د رئیس او ښاغلی حافظ انجنیر عبدالطیف خالد د کانونو او پټرولیم وزارت د وړاندیز او د ریاست الوزرا د حکم په اساس د تخنیکي پلټنې د رئیس په توګه د پنجشنبې په ورځ د ١٤٠٣/١٢/١٦ نېټې د پلان او پالیسي مرستیال شیخ الحدیث مولوي عبدالرحمن قانت له لوري د یادو ریاستونو کارکوونکو ته ور وپېژندل شول.
په دې غونډه کې د مقام سلاکار مولوي مطیع الله حقاني، د دفتر عمومي رئیس الحاج معراج محمد معراج او یو شمېر رئیسانو هم ګډون کړی و.
د کانونو او پټرولیم وزارت د پلان او پالیسۍ مرستیال نویو رئیسانو د بریالیتوب هیله وکړه، په همکارۍ او همغږۍ یې ټینګار وکړ او ویې ویل: " په اداراتو کې بدلون یو اصل دی همغږي او ګډ کار کولای شي چې تر بریا مو ورسوي.
نویو رئیسانو د کانونو او پټرولیم وزارت د مشرتابه له خوا پر دوی د باور له امله مننه وکړه، ژمنه یې وکړه چې د ورسپارل شویو دندو د ښه ترسره کولو لپاره به هیڅ ډول هڅې ونه سپموي، او همدارنګه یې له خپلو همکارانو څخه د هراړخیزې همکارۍ غوښتنه وکړه.
