د کانونو او پټرولیم وزارت سرپرست د ازبکستان هېواد له دولتي شرکتونو لیدنه وکړه
د کانونو او پټرولیم وزارت سرپرست الحاج ملا هدایت الله بدري ازبکستان ته د خپل سفر په ترڅ کې یې د کانونو او سروې وزیر سره یوځای دیاد هېواد له چارواکو سره ولیدل، افغان لوړپوړي پلاوي او د ازبکستان د دولتي شرکتونو رئیسانو په بېک اباد ښار کې د اوسپنې له دولتي شرکتونو او په الملق ښار کې یې د جستو، سروزرو، مسو کانونو او پروسس کارخونو څخه لیدنه وکړه.
د هغه هیواد د سروې او کانونو وزیر د کانونو او پټرولیم وزارت د سرپرست د سفر هرکلی وکړ او زیاته یې کړه چې دا ډول سفرونه د دواړو هېوادونو ترمنځ اقتصادي اړیکې پیاوړې کوي.
د کانونو او پټرولیم وزارت سرپرست د دوی د میلمه پالنې څخه مننه وکړه او په افغانستان کې یې د پانګونې او کانونو په برخه کې د دې هېواد د همکارۍ غوښتنه وکړه..
