د کانونو او پټرولیم وزارت سرپرست د فنګویان چین لمټېد کمپنۍ له رئیس سره ولیدل
د کانونو او پټرولیم وزارت سرپرست شیخ الحدیث شهاب الدین دلاور د چین هېواد فنګویان لمټېد کمپنۍ له رئیس او مل پلاوي سره په خپل کاري دفتر کې ولیدل.
په دغه لیدنه کې یې د افغانستان د کاني زېرمو په برخه کې د پانګونې په شته فرصتونو خبرې وکړې او په هېواد کې د سرتاسري امنیت په اړه بحث او نظرونه شریک کړل.
د یادې کمپنۍ رئیس د هېواد د نفتو د کانونو په برخه کې د پانګونې په موخه خپله لېوالتیا څرګنده کړه ویې ویل: یاده کمپنۍ د عصري وسایلو او متخصصو کارمندانو په درلودو سربېره د اکتشاف په برخه کې د مډرنو وسایلو او د 2013 کال راپه دېخوا د قرغزستان هېواد د نفتو د استخراج او پروسس په برخه کې په کار بوخت دي.
د کانونو او پټرولیم وزارت سرپرست ورته د ښه راغلاست تر څنګ د یاد شرکت څخه وغوښتل چې خپله طرحه او پروپوزل وړاندې کړي، او په همدې موخه یې ورسره د لازمو همکاریو ژمنه وکړه.
