د کانونو او پټرولیم وزارت د رهبري هیئت غونډه تر سره شوه.
د کانونو او پټرولیم وزارت د رهبري هیئت غونډه نن پنجشنبه 2/4/1401 نېتې د وزارت د سرپرست شیخ الحدیث شهاب الدین دلاور په مشرۍ، د معینانو او رئیسانو په شتون د وزارت د کنفرانسونو په تالار کې تر سره شوه.
غونډه د پکتیکا او خوست ولایتونو د زلزلو د شهیدانو روح ته په دعا سره پیل شوه. ورپسې بیا ښاغلي محمد افضل صافي په افغانستان کې د فاسفیت او د هغې د پیدایښت په اړه مفصل معلومات د پریزنټیشن له لارې وړاندې کړل. او همدارنګه د معلوماتي ټکنالوجۍ رئیس عبدالله موسی زي هم په وزارت کې د امنیتي کمرو د چمتو کولو او نصبولو په اړه پریزنټیشن وړاندې کړ.
په پای کې د کانونو او پټرولیم وزارت سرپرست د اسلامي زده کړو او په بېلابېلو برخو کې د دغه وزارت د کارکوونکو د ظرفیت لوړونې په اړه اړوندو مسوولینو ته لازمې لارښوونې وکړې.
