له شبرغان څخه تر مزار شریف پورې د ګازو د انتقال د ۹۴،۵ کیلومتره پایپ لاین ساختماني چارې به په راتلونکې ۳ میاشتو کې پیل شي
![ddd](/sites/default/files/2020-12/129163232_2724581277753966_2831204760022408985_n.jpg)
د کانونو او پټرولیم وزیر محمد هارون چخانسوري په مشرۍ د مزارشریف د برېښنا کوټ (Mazar IPP) د پروژې په چارو کې د پرمختګ او انسجام په موخه، د لوړې کچې شریکانو غونډه د ویډیوکنفرانس له لارې ترسره شوه.
په دې غونډه کې د پروژې د تدارکاتي پروسو سربېره، دپروژې د حقوقي برخې او د پروژې د مهالوېش په اړه هراړخیز بحث وشو.
د کانونو او پټرولیم وزیر محمد هارون چخانسوري د غونډې ګډونوالو ته وویل چې، "د مزارشریف د برېښنا کوټ د پروژې په چارو کې د بهبود او د ښې همغږۍ په موخه، د پروژې لپاره ټاکل شوی مهالوېش باید په سمه توګه عملي شي."
هغه زیاته کړه: د لوړې کچې د شریکانو د غونډې سربېره دې هره اوونۍ تخنیکي غونډې هم ترسره شي ترڅو د شریکانو ترمنځ همغږي لا پیاوړې او د پروژې د تطبیق لپاره موثره زمینه مساعده شي.
ټاکل شوې له شبرغان څخه تر مزار شریف پورې د ګازو د انتقال د ۹۴،۵ کیلومتره پایپ لاین ساختماني چارې په راتلونکې ۳ میاشتو کې پیل او د یوه کال په موده کې تکمیل شي. ددغه پایپ لاین له ګازو څخه به د ۵۰ میګاواټ برېښنا د تولید او د مزار شریف په برېښنا کوټ کې له استفادې سربیره د سرې او ښېښو د تولید په فابریکو کې ګټه واخیستل شي.