د کانونو او پټرولیم وزارت سرپرست د ازبکستان هېواد دانرژۍ له وزیر اود بېلابېلو وزارتونو له استازو سره وکتل
د کانونو او پټرولیم وزارت سرپرست الحاج ملاهدایت الله بدري او مل پلاوي ازبکستان هېواد ته د خپل رسمي سفر په ترڅ کې یې د یاد هېواد د انرژۍ له وزیر، د نفتو او ګازو له رئیس، د ازبکستان د جیولوجي پوهنتون له رئیس، د معلوماتي ټکنالوجۍ له مرستیال، په ازبکستان کې له افغان سوداګرو سره له تکنو پارک او کانونو میوزیم څخه لیدنې
ترسره کړې.
په دغو لیدنو کې یې د یاد هېواد پانګوالو ته بلنه ورکړه ویې ویل: افغانستان د کاني سرچینو له پلوه یو بډایه هېواد دی او د اسلامې امارت په راتګ سره ټولو کورنیو او بهرنیو پانګوالو ته د پانګونې ښه زمینه برابره شوې ده او کولای شي ترڅو د افغانستان د کاني سرچینو په برخه کې پانګونه وکړي، دغه رازیې د انرژۍ له وزیر، د جیولوجي پوهنتون له رئیس او د ازبک د نفتو او ګازو له رئیس سره په کتنه کې د افغان انجنیرانو د ظرفیت لوړولو او کانې زېرمو په اړه بحث او خبرې وکړې او دیاد هېواد د بېلا بېلو کارخونو څخه یې لیدنې هم وکړې.
همدارنګه له افغان پانګوالو سره یې په لیدنه کې د پانګونې په موخه د هر راز قانوني همکاریو ژمنه وکړه او هغوی ته یې بلنه ورکړه، چې ترڅو په خپل هېواد کې پانګونه وکړي او خپل هېواد ته د خدمت جوګه شي.
