د ننګرهار ولایت تالک کان تړون لاسلیک شو
د کانونو او پټرولیم وزیر الحاج ملاهدایت الله بدري د سه شنبې په ورځ د ۱۴۰۵لمریز کال د وږي میاشتې په ۱۷مه نېټه د ننګرهار ولایت د سپین غر ولسوالۍ شینواري سیمې درېیم بلاک تالک کان چې ۶.۷۵۹۶۶ کیلومټره مربع مساحت لري د ۴۵۱۸۳۰۰ میلیونه امریکايي ډالرو په ارزښت د عمرفاروق د تالک پروسس شرکت له رئیس سره په خپل کاري دفتر کې لاسلیک کړ.
د کانونو او پټرولیم وزیر د یاد تړون د لاسلیک پر مهال وویل، چې د دغه تړون له لاسلیک سره به د سیمې خلکو ته د کار او اقتصادي فعالیتونو زمینه برابره شي او د کان د استخراج او پروسس چارې به د اړوندو قوانینو او اصولو له مخې ترسره شي.
نوموړي زیاته کړه، چې قراردادي شرکت به د کان د استخراج له هر ټن تالک څخه ۱۳۲۰ افغانۍ رویالټي اسلامي امارت ته ورکوي. سربېره پردې به د ټولنیزو خدمتونو په برخه کې هم د سیمې خلکو ته خدمات وړاندې کوي.
همدا راز د یاد شرکت رئیس ژمنه وکړه، چې ټولې چارې به د کان کېندنې د اصولو او کړنلارو له مخې ترسره کوي.
