د لوی او کوچني کچې کان کېندنې اعلانول او د قیمتي او نيمه قيمتي ډبرو جوازونو صادرولو په اړه معلومات وړاندې شول
نن د همدې موخې له پاره د افغانستان د کانونو خونې په مرکزي دفتر کې غونډه جوړه شوه، په غونډه کې د کوچني کچې کان کیندنې سکټور کې د پانګوونې فرصتونو او ۲۱ لويو او د ۱۲۱ د کوچني کان کیندنې پروژو د قیمتي او نیمه قیمتي ډبرو صادراتو په اړه معلومات وړاندې شول.
په پېل کې د افغانستان د صنایعو خونې او کانونو وزارت مرستیال منصور احمدزي، میلمنو ته د ښه راغلاست ویلو ترڅنګ د دې وزارت له منظمې همکارۍ څخه مننه وکړه او د پانګوالو د شخړو او ستونزو په حل کې یې د لا زیاتې همکارۍ غوښتنه وکړه.
ورپسې د استخراج برنامو د پالیسۍ او اسانتیا مرستیال محمد عتیق ذکي وويل: زه خوښ یم چې نن د هغې ژمنې مطابق چې مخکې مو د کان کیندنې سکتور کې د پانګوونې پروژو سره کړې وې ستاسو په خدمت کې یم.
نوموړي همدارنګه زیاته کړه چې د کانونو او پټرولیم وزارت له تېر یو کال راهیسې د جیولوژي سروې له مخې شااوخوا (۳۰۰) د لویې او کوچني کچې کان کېندنې ساحو باندې کار وکړ. چې یادې سیمې د عالي اقتصادي شورا او کابینې لخوا تصویب شوي وې او د پانګوونې غوښتنلیک ترلاسه کولو هدف لپاره اعلان ته و سپارل شوې چې په دغو کان کېندنو ساحو کې سره زر، اوسپنه، سرپ، سمنټ، مرمر او ساختماني مواد شامل دي.
د ياد وزارت مرستيال زیاته کړه، د يو کارنده حقوقي چوکاټ د کان کیندنې قراردادونو پروسې مؤثره او غوره پلي کولو او مدیریت لپاره عمده عامل بلل کېږي. له همدې امله د حکومت مشرتابه په ځانګړي توګه د کانونو او پټرولیم وزارت له تیر یو کال راهیسې د استخراجي صنعت سکتور قانوني چوکاټ ښه کولو لپاره کار کوي او د دې کار هدف د کان کیندنې فعالیتونو لپاره یو باثباته قانوني بورډ چمتو کول او د پانګوالو لپاره د داوطلبۍ پروسې کې زیاتې اسانتیاوې برابرول دي.
وروسته بیا د لوی او کوچني پروسس او قیمتي او نیمه قیمتي ډبرو پروژو لپاره د داوطلبۍ پروسې په تړاو د کوچني قراردادونو رییس انجینر محمد همایون رشید ، د لويو کانونو تنظیم امور مشر سید ذبیح الله شاداب او د کانونو د ساتنې کمیټې عمومي رئيس انجینیر خلیل الرحمن ژوند ګډونوالو ته د پریزینټیشن له لارې معلومات وړاندې کړل.
