د امام ابو حنیفه (رح) په درېیم ملي او نړیوال نندارتون کې د کانونو او پټرولیم وزارت سرپرست ګډون وکړ
د کانونو او پټرولیم وزارت سرپرست الحاج ملا هدایت الله بدري د یکشنبې په ورځ د 15/7/1403 نېټې د امام ابو حنیفه (رح) د درېیم ملي او نړیوال نندارتون د پرانیستلو پر مهال په داسې حال کې چې د ریاست الوزراء اقتصادي مرستیال ملا عبدالغني برادر او د کابینې یو شمېر وزیرانو، ملي او نړیوالو پانګوالو ګډون کړی وو خبرې وکړې.
د کانونو او پټرولیم وزارت سرپرست وویل: د خوښۍ ځای دی چې نن په دغه نندارتون کې د اسلامي امارت له مشرانو، سفیرانو، ملي او نړیوالو پانګوالو سره یوځای ګډون لرم.
الحمد لله د اسلامي امارت په راتګ سره کورنیو تولیداتو ته ځانګړې پاملرنه شوې ده، دغه نندارتون د هېواد د اقتصادي پرمختګ یوه ښه بېلګه ده او په دې موده کې اسلامي امارت توانېدلی، چې اقتصادي وده لکه سړک جوړونه، د کانونو تړونونه او کیندنه، برېښنا په ټول هېواد کې سرتاسري امنیت او هېوادوالو ته یې کاري فرصتونه رامنځته کړي دي.
د کانونو او پټرولیم وزارت سرپرست دغه راز وویل، د افغانستان کاني سرچینو کې ټول افغانان یو شان حق لري او د اقتصادي ودې په برخه کې ځانګړی ځای لري.
په پای کې هغه زیاته کړه: موږ هڅه کوو چې د کانونو په سکټور کې د روڼتیا، د عوایدو په راټولولو او د ملي پروژو په پلي کېدو سره له ټولنې څخه فقر له منځه یوسو او ان شاالله هېواد به د اقتصادي ودې په لور رهبري کړو.
