د افغانستان کانونو د ستراتیژۍ جوړولو په اړه مشورتي غونډه ترسره شوه
یاده غونډه کې د کانونو او پټرولیم وزارت د پلان او پالیسي مرستیال شیخ الحدیث مولانا عبدالرحمن قانت، د وزارت ستر سلاکار انجنیر وحیدالله حلیمي، د مقام د دفتر عمومي رئیس الحاج معراج محمد معراج د بېلابېلو برخو رئیسانو د کانونو قراردادي شرکتونو استازو ګډون کړی و.
غونډه د قرانکریم د مبارکو ایاتونو په تلاوت سره پیل شوه ورپسې د پلان او پالیسي مرستیال د قراردادي شرکتونو استازو ته د ښه راغلاست ترڅنګ وویل: موږ او تاسو باید په ګډه د هېواد ودانولو په برخه کې په پوره اخلاص او روڼتیا سره کار وکړو، له ټولو قراردادي شرکتونو مننه کوم چې د هېواد اقتصادي ودې او کاري فرصتونو برابرولو په برخه کې کاري کوي.
همدارنګه د جیولوجي او سروې په برخه کې د مقام ستر سلاکار انجنیر محمد افضل ساپي له لوري له ګډونوالو سره د کان کیندنې ستراتیژۍ د مخه په پام کې نیول، له جیولوجيکي نقشې څخه ګټه اخیستل، د کانونو تل پاتې ودې په لار کې شته ستونزو په اړه د پرزنټېشن له لارې معلومات وړاندې کړل.
د پانګونې د اسانتیا رئیس خلیل ژوند د پوښتنلیک د تشریح او ډکولو په موخه د شرکتونو له استازو سره معلومات شریک کړل دغه راز د شرکتونو استازو هم خپل وړاندیزونه او نظریات وړاندې کړل.
د وزارت ستر سلاکار انجنیر وحیدالله حلیمي او د مقام د دفتر عمومي رئيس الحاج معراج محمد معراج د دوی د وړاندیزونو او نظریاتو له وړاندې کولو مننه وکړه او له خپله لوري یې ورسره د هر راز همکاریو ژمنه وکړه.
