د هلمند ولایت د رخامو کانونو شرکتونو له استازو سره د چارو د ښه والي په موخه غونډه ترسره شوه
د کانونو او پټرولیم وزارت د کانونو د ساتنې ریاست رئیس، الحاج مولوي نعمت الله عباس په مشرۍ پلاوي د هلمند ولایت د رخامو کانونو د شرکتونو له استازو سره د همغږۍ او عامه پوهاوي په موخه غونډه ترسره کړه.
په یاده غونډه کې د رخامو کانونو د شرکتونو له رئیسانو او اړوندو مسوولینو سره د شویو ژمنو د عملي کېدو، د کانونو د قانوني استخراج، د پروسس کارخونو د جوړولو، د ټولنیزو خدمتونو وړاندې کولو، د چاپېریال ساتنې او نورو اړوندو موضوعاتو په اړه یې خبرې وکړې. همدارنګه ګډونوالو ته د یادو برخو د لا ښه پلي کولو لپاره لازمې لارښوونې او سپارښتنې و شوې.
د دغې غونډې موخه د رخامو کانونو د فعالیتونو د ارزونې، د شته ظرفیتونو او نیمګړتیاوو پېژندل، د چارو د ښه والي لپاره د عملي سپارښتنو وړاندې کول او د کانونو او پټرولیم وزارت د خدمتونو د اغېزمنتیا لوړول وو.
