د سرپل ولایت د بلخاب ولسوالۍ د کانونو له سیمو څخه څارنه او لیدنه
د کانونو او پټرولیم وزارت سرپرست الحاج ملا هدایت الله بدري، چې د امارتي شرکتونو د رهبري هیئت رئیس مولوي احمدجان بلال او د ملي پراختیا شرکت عمومي اجرائیوي رئیس عبدالرحمن عطاش یې ملتیا کوله د سرپل ولایت بلخاب ولسوالۍ د ډبرو سکرو د استخراج څخه د لیدنې او څارنې په موخه لیدنه ترسره کړه.
ددغه سفر په ترڅ کې یې په میدان وردګو ولایت کې د ډبرو سکرو د لوی مارکیټ له ساحې څخه لیدنه وکړه چې د ملي پراختیا شرکت له لوري جوړېږي او بیا یې بلخاب ولسوالۍ ته د خپل سفر په دوام د لارې په اوږدو کې یې له هغو سړکونو لیدنه وکړه، چې د ملي پراختیا شرکت له لوري ترمیم او جوړشوي دي چې بامیان ولایت د سمنګانو ولایت له دره صوف او د سرپل له بلخاب ولسوالۍ سره نښلوي.
یاد پلاوي د بلخاب ولسوالۍ ګلورز او ګواخ د ډبرو سکرو له کانونو هم څارنه وکړه او د دې ولسوالۍ د ډبرو سکرو د استخراج په برخه کې يې د ملي پراختيا شرکت د فعاليتونو ستاینه وکړه.
له څه مودې راهیسې د ملي پراختیا شرکت د سرپل ولایت په بلخاب ولسوالۍ کې د ډبرو سکرو د اکتشاف، استخراج او پلور دنده پر غاړه لري او په دې موده کې یې د ډبرو سکرو د استخراج او د یادې ولسوالۍ د سړکونو د جوړولو او ترمیم په برخه کې اغېزمن فعالیتونه پیل کړي دي.
