په هېواد کې د قیمتي او نیمهقیمتي ډبرو د پروسس مراکزو جوړیدل به، د ملي عایداتو د زیاتوالي او کاري فرصتونو د رامینځته کیدو سبب شي
د کانونو او پټرولیم وزارت مالي او اداري مرستیال ښاغلي محمد حمید یوسفي د بلجیم هېواد د (Mac Precious Stones) کمپنی له تخنیکي مسؤول ښاغلي میشل سره، د تیرو کتنو په څیر د افغانستان په قیمتي او نیمهقیمتي ډبرو د پانګوونې په اړه خبرې وکړې.
په یاده ناسته کې، د یادې کمپنی تخنیکې مسؤول د قیمتي او نیمهقیمتي ډبرو د قانوني استخراج او د یادو ډبرو د پروسس مرکز د جوړیدو په اړوند د خپلو طرحو د وړاندې کولو ترڅنګ، د امنیتي وضعیت او غیرقانوني استخراج په اړه خپلې اندیښنې شریکې کړې.
له هغه وروسته، د کانونو او پټرولیم وزارت مالي او اداري مرستیال، د یادې کمپنی د طرحو هرکلی وکړ او د افغانستان قیمتي او نیمهقیمتي ډبرو زیرمې یې د پانګونې لپاره مناسبې وبللې. او زیاته یې کړه چې، کانونو او پټرولیم وزارت د بېلابیلو خواوو څخه د پانګوونې لپاره لازمې اسانتیاوې مساعدې کړي او افغان دولت د پانګوونې ملاتړ ته په بشپړه توګه ژمن دی.
د یادونې وړ ده، چې د قیمتي او نیمهقیمتي ډبرو د پروسس مرکز په جوړیدو سره به د هېواد کاني سکتور استخراج ګړندۍ، د عایداتو لوړیدل او ترڅنګ به یې لس زره هېوادوالو ته په مستقیمه او غیرمستقیمه توګه د دندې فرصتونه رامینځته کړي.
