د کانونو د تخنیکي پلټنې ریاست رئیس د پروان د تړوني شرکتونو له استازو سره وکتل
د هغې لیدنې په ترڅ کې چې د کانونو د تخنیکي پلټنې ریاست د ارزونې ټیم د پروان ولایت د کانونو د تړوني شرکتونو د کاری سیمو څخه تر سره کړې وه، د تخنیکي مالي او اداري نیمګړتیاوو د حل په موخه، د کانونو د تخنیکي پلټنې ریاست رئیس انجنیر عبداللطیف خالد، د شنبې په ورځ د ۱۴۰۴ لمریز کال د وږي میاشتې په ۸مه نېټه د یادو تړوني شرکتونو له رئیسانو او استازو سره د اړوندو موضوعاتو او د کیندنې بهیر د کړنلارې سره سم یې د شرکتونو د چارو د ښه والي په اړه خبرې وکړې.
ورپسې د کانونو د تخنیکي پلټنې ریاست د ارزونې ټیم له خوا د شرکتونو د رئیسانو مسوولیتونو، د کارکوونکو مکلفیتونو، ستونزو او نیمګړتیاوو په اړه پرزنټېشن وړاندې شو.
د یادو شرکتونو استازو ژمنه وکړه، چې خپلې کاري نیمګړتیاوې او ستونزې به ژر حل کړي او همدارنګه یې د کانونو د کیندنې پلانونو او طرحو په اړه لنډ معلومات وړاندې کړل. دوی خپلې ستونزې او وړاندیزونه د خپلو چارو د ښه والي په موخه شریک کړل او غوښتنه یې وکړه، چې یاد موضوعات دې د وزارت له مشرتابه سره شریک شي.
