کونړ کې د کانونو ساتنې او څارنې په پار ځانګړې کمېټه جوړه شوه

د ا.ا اقتصادي کمېسیون د پرېکړې تطبیق په پار د کانونو او پټرولیم وزارت مالي او اداري مرستیال مولوي حسام الدین صابري په مشرۍ  یو پلاوی  د سه شنبې په ورځ د 19/2/1402 نېټې کونړ ولایت ته خپل سفر وکړ او د کونړ له مرستیال والي سره د کتنې ترڅنګ یې د دغه ولایت د یو شمېر ادارو له مسوولینو سره ناسته وکړه.
ښاغلي صابري د اقتصادي کمېسیون د پرېکړې په اساس دغه ولایت کې د کانونو چارو رئیس په مشرۍ د مستوفيت، اقتصاد، استخباراتو، امنیه قوماندانۍ، کرنې، چاپيريال ساتنې، برېښنا، صنعت او سوداګرۍ او سينديزه حوزې رییسانو ګډه کمېټه جوړه کړه چې د کانونو څارنې او حفاظت په برخه کې به اغېزمنې هڅې وکړي. 
ورپسې د کونړ مرستیال والي مولوي عبدالله حقاني او نورو ګډونوالو د کانونو د مسلکي کیندنو او د خلکو ستونزو د حل په برخه کې خپلې غوښتنې یاد پلاوي ته وړاندې کړې او په دې برخه کې د وزارت د پوره همکاریو هیله وکړه.
او همدارنګه د پلاوي غړو مولوي مطيع الله حقـاني، مفتي عبدالحميد اخندزاده، انجينر مرتضی واحدي او انجينر پوپل فيضي هم د یادو موضوعاتو په اړه خپل نظرونه شریک او د همکاریو ډاډ یې ورکړ.