د کانونو او پټرولیم وزارت سرپرست د انګلستان سفارت له چار سمبالي سره ولیدل

د کانونو او پټرولیم وزارت سرپرست شیخ الحدیث شهاب الدین دلاور د انګلستان سفارت له چار سمبالي ښاغلي روبیرت ډیکسن او عملیاتي مرستیالې سره په خپل کاري دفتر کې ولیدل، د بېلابېلو موضوعاتو په اړه د خبرو ترڅنګ یې د د واړو هېوادونو ترمنځ د اړیکو پرښه والي ټېنګار وکړ.
د کانونو او پټرولیم وزارت سرپرست زیاته کړه: الحمدالله د اسلامي امارت په راتګ سره په ټول هېواد کې امنیت تامین دی او یو واحد حاکمیت شتون لري، بین الافغاني پخلاینه رامنځته شوې، همدارنګه د ټولو افغانانو لپاره عمومي عفوه اعلان شوې کولی شي چې خپل هېواد ته راستانه شي.
د کانونو او پټرولیم وزارت سرپرست د اداري فساد، نشه یي توکو، د څلورمیلیونه روږدو کسانو ټولولو، د سوالګرو بایو مټریک او هغو لپاره میاشتنۍ معاش، د اقتصادي پرمختګونو په ځانګړې توګه د  عوایدو، د کوچنیو او لویو کانونو د قراردادونو، د اسلامي امارت په ټولو لاسته راوړنو په اړه معلومات وړاندې کړل.
د انګلستان سفارت چارسمبالي د کانونو او پټرولیم وزارت له مېلمه پالنې څخه مننه وکړه، له پاکستان څخه د راستنېدونکو کډوالو او زلزله ځپلو سره یې د مرستو د ډېروالي خبره وکړه.
په پای کې د کانونو او پټرولیم وزارت سرپرست وویل: د افغانستان اسلامي امارت د نړۍ له ټولو هېوادونو سره د اقتصادي او سیاسي تعاملاتو غوښتونکی دی.