د قرغزستان هېواد پانګوال د هېواد د کاني زېرمو په برخه کې د پانګونې په موخه خپله لېوالتیا څرګنده کړه
د افغانستان اسلامي امارت د کانونو او پټرولیم وزارت سرپرست الحاج ملا هدایت الله بدري د شنبې په ورځ د 30/4/1403 نېټې د قرغزستان د کانونو وزارت پخواني مرستیال او پانګوال الماس بېک او مل پلاوي سره په خپل کاري دفتر کې وکتل.
په پیل کې د قرغزستان هېواد پانګوال د کانونو او پټرولیم وزارت سرپرست ته مبارکي ورکړه او په ورسپارل شویو دندو کې یې ورته د لا بریالیتوب هیله وکړه، دوی همدا راز د افغانستان د اسلامي امارت له لوري د پانګونې په برخه کې د مناسب چاپېریال او سرتاسري امنیت برابرولو له کبله خوښي څرګنده کړه او د افغانستان د سرو زرو، انتیموني او تیلو کانونو کې یې د پانګونې لېوالتیا څرګنده کړه. د هېواد د کانونو د قانون او طرزالعمل مطابق به دوی سل په سلو کې په افغانستان کې دننه پروسس کوي، دوی دغه راز ژمنه وکړه، چې په یاد هېواد او افغانستان کې دننه به د انجنیرانو او د وزارت د کارکوونکو د پوهاوي د کچې د لوړولو په برخه کې همکاري وکړي.
د کانونو او پټروليم وزارت سرپرست په يادو کانونو کې د پانګونې په موخه د دوى د لېوالتيا هرکلی وکړ او ډاډ يې ورکړ، چې د کانونو د قانون او کړنلارې له مخې به د پانګونې د زمينې په برابرولو په برخه کې له دوى سره همکاري وکړي.
