د تخنیکي پلټنې رئیس د لوګر ولایت له کانونو لیدنه وکړه
د کانونو او پټرولیم وزارت د کانونو د تخنیکي پلټنې رئیس حافظ انجنیر عبداللطیف خالد د یوه پلاوي په ملتیا لوګر ولایت ته د سفر پر مهال یې د کانونو ریاست، د فلزي کانونو اړوند کانکیندنې پروژو او د التمور سیمې د ساکو افغان سمنټو پروژې له روانو چارو څخه لیدنه وکړه.
د معلوماتو له مخې په لوګر ولایت کې دا مهال د لویې او کوچنۍ کچې ځینې پروژې تر کار لاندې دي، چې درې پروژې یې د محمداغې ولسوالۍ او دوه نورې د ازرې ولسوالۍ کې موقعیت لري.
پلاوي د یادو پروژو تخنیکي پلټنه ترسره کړه او قراردادي شرکتونو ته یې د چارو د ښه والي، اصلاحاتو او معیاري پلي کېدو په اړه لازمې سپارښتنې وکړې.
همدارنګه، د ساکو افغان سمنټو قراردادي شرکت د فعالیتونو ارزونه هم وشوه او مسوولینو ته یې د چارو د لا ښه پرمختګ لپاره تخنیکي مشورې ورکړل شوې. سربېره پر دې یې د قراردادي شرکتونو استازو باندې ټینګار وکړ، چې خپلې ژمنې دې په ټاکلي وخت بشپړې کړي او د تخنیکي پلټونکو سپارښتنو او شته نیمګړتیاوو ته دې پر وخت رسېدنه وکړي.
