د کانونو او پټرولیم وزارت د سوداګرۍ او پانګونې خونې تر منځ د همکاریو هوکړه لیک لاسلیک شو
د کانونو او پټرولیم وزارت او د سوداګرۍ او پانګونې خونې تر منځ د ګډو همکاریو هوکړه لیک د سه شنبې په ورځ، د ۱۴۰۴/۳/۱۳ نیټه لاسلیک شو.
یاد هوکړه لیک د کانونو او پټرولیم وزارت د پالیسۍ او برنامو مرستیال شیخالحدیث مولوي عبدالرحمن قانت، د افغانستان د سوداګرۍ او پانګونې خونې لومړي مرستیال محمد یونس مهمند، د سوداګرۍ خونې غړو او رسنیو په شتون کې لاسلیک شو.
دا هوکړه لیک د ګډو همکاریو، همغږۍ، د دواړو خواوو تر منځ د اړیکو د پراختیا، په هېواد کې د کانونو په برخه کې د پانګونې فرصتونو، د کانونو په برخه کې د کورنۍ او بهرنۍ پانګونې د جلب او جذب، د سوداګرو تر منځ د اړیکو جوړولو، د نړیوالو شریکانو او بهرنیو پانګوالو سره د اړیکو پیاوړتیا او د کانونو په سکټور کې د پانګونې اړوند معلوماتو ته د لاسرسي زمینه برابرولو په موخه لاسلیک شو.
په پیل کې ښاغلي مهمند د ښه راغلاست ویلو ترڅنګ د خپلو فعالیتونو او لاسته راوړنو په اړه خبرې وکړې ویې ویل: موږ هڅه کوو چې خپل کارونه په پوره روڼتیا او د قانون مطابق ترسره کړو. همدارنګه یې زیاته کړه، چې کانونه د هېواد ملي سرمایه ده او ساتل یې د ټولو افغانانو دنده ده، په استخراج او پروسس کې یې باید ځانګړې پاملرنه وشي.
ور پسې د کانونو او پټرولیم وزارت د پالیسۍ او برنامو مرستیال د هېواد د کاني سرچینو په اړه خبرې وکړې زیاته یې کړه: د کانونو په استخراج او پروسس کې د روڼتیا او صداقت له لارې کولای شو هېواد د اقتصادي پرمختګ لور ته بوځو، د کانونو او پټرولیم وزارت رهبري هڅه کوي، چې ملي او نړیوالو پانګوالو ته د پانګونې لپاره نورې اسانتیاوې برابرې کړي.
دغه راز پانګوالو د ګمرکي تعرفو، ترانسپورټي لګښتونو، رویالټۍ، د قیمتي او نیمه قیمتي ډبرو د قیمت ټاکلو کمېټې جوړولو، صادراتو او بانکي تضمینونو د موضوعاتو په اړه خپل وړاندیزونه او ستونزې د پالیسۍ او برنامو له مرستیال سره شریکی کړې، د هغوی د ستونزو د حل په موخه یې د کانونو د قوانینو او کړنلارو له مخې ورسره د همکاریو ژمنه وکړه.
