د کانونو او پټرولیم وزارت سرپرست د ترکیې له سفیر سره وکتل
د کانونو او پټرولیم وزارت سرپرست شیخ الحدیث شهاب الدین دلاور نن پنجشنبې 1401/4/23 د ترکیې له سفیر ښاغلي جهاد ارګین او مل پلاوي سره د وزارت په مقام کې وکتل او په بېلابېلو موضوعاتو یې خبرې وکړې.
د ناستې په پیل کې د ترکیې او افغانستان ترمنځ پر ښو، اوږدمهاله او دوستانه اړیکو خبرې وشوې. ښاغلي جهاد ارګین وویل: موږ د افغانستان له خلکو او هېواد سره ژورې اړیکې لرو او د دواړو هېوادونو اړیکې دوستانه دي.
د کانونو او پټرولیم وزارت سرپرست وویل: دغه وزارت د ټولو هغو ملي او نړیوالو پانګوالو هرکلی کوي چې غواړي په افغانستان کې د کانونو په سکتور کې پانګونه وکړي او د هغوی لپاره زمینه برابره کړي.
د ترکیې سفیر څرګنده کړه چې هېواد به یې د افغانستان له خلکو سره په بېلابېلو برخو کې همکاري وکړي. او همدارنګه یې د افغان شخصیتونو سره د اړیکو کمیسیون له لارې د تېر حکومت سیاسیونو د راستنېدو په اړه خبرې اترې وشوې.
