د کانونو او پټرولیم وزیر د ازبکستان له سفیر سره وکتل
د کانونو او پټرولیم وزیر الحاج ملا هدایت الله بدري د ۱۴۰۵ لمریز کال د چنګاښ میاشتې په ۲۱مه نېټه د یکشنبې په ورځ د ازبکستان جمهوریت له سفیر اویبیک عثمانوف سره په خپل کاري دفتر کې وکتل.
په دې کتنه کې دواړو لورو د ګډو همکاریو د پراختیا او پیاوړتیا، د دواړو هېوادونو ترمنځ د سوداګریزو او اقتصادي اړیکو د لا ټینګښت او په ځانګړي ډول د افغانستان د کانونو په برخه کې د پانګونې په اړه بحث او نظرونه شریک کړل.
د ازبکستان سفیر د کانونو او پټرولیم وزارت د رهبرۍ له مېلمهپالنې څخه د مننې ترڅنګ، په بېلابېلو برخو کې د اسلامي امارت لاسته راوړنې مهمې وبللې او د افغانستان د کانونو په برخه کې یې د پانګونې په موخه د خپل هېواد د پانګوالو د لېوالتیا په اړه خبرې وکړې. همدارنګه نوموړي د طوطي میدان پروژې په برخه کې د شته ستونزو په اړه خپل نظرونه او وړاندیزونه شریک کړل.
د کانونو او پټرولیم وزیر د ازبکستان هېواد د پانګوالو د لېوالتیا هرکلی وکړ او ډاډ یې ورکړ چې دغه وزارت به د بهرنیو پانګوالو د جذب، ملاتړ او هڅونې په موخه هر اړخیزه همکاري وکړي او لا زیاتې اسانتیاوې به ورته برابرې کړي.
