د کانونو او پټرولیم وزارت سرپرست د ترکمنستان هېواد له لوړ پوړو چارواکو سره وکتل
![س](/sites/default/files/2024-08/whatsapp_image_2024-08-29_at_11.11.13_pm.jpeg)
د کانونو او پټرولیم وزارت سرپرست الحاج ملا هدایت الله بدري او ورسره مل پلاوي ترکمنستان ته د خپل سفر په ترڅ کې په جلا کتنو کې د یاد هېواد د بهرنیو چارو وزارت له وزیر، د کابینې مرستیال، د نفتو او ګازو وزیر، د ټاپي پروژې رئيس، د صنعت او ښار جوړولو وزیر او د اوسپنې پټلۍ له رئیس سره وکتل.
د ترکمنستان د بهرنیو چارو له وزیر سره په کتنه کې يې د ټاپي، ټاپ، ریل پټلۍ، نوري فایبر، د نفت او ګازو او سوداګریزې راکړې ورکړې په اړه خبرې وکړې.
دغه راز یې د نفت او ګازو له وزیر او ټاپي پروژې له رئیس سره په لیدنه کې د ټاپي پروژې سربېره د نفت او ګازو په اړه خپل نظرونه، وړاندیزونه شریک کړل.
سربېره پر دې دیاد هېواد د صنعت او ښار جوړولو وزیر د اوسپنې کانونو په برخه کې خپله لېوالتیا څرګنده کړه، د کانونو او پټرولیم وزارت سرپرست د اوسپنې کانونو په برخه د پانګونې په موخه د دوی د لېوالتیا ستاینه وکړه او له خپل لوري یې ورسره د هر راز همکاریو ډاډ ورکړ دغه راز یې په هرات ولایت کې د یو ګډ کمپلکس د جوړېدو وړاندیز وکړ.
د وزارت سرپرست د ترکمنستان د اوسپنې پټلۍ له رئیس سره په جلا کتنه کې د اوسپنې پټلۍ د ارزښت اهمیت په اړه خبرې وکړې او غوښتنه یې وکړه چې د اوسپنې پټلۍ دې هرات او مزار ښار ته هم وغځول شي، وزیر صاحب زیاته کړه: دا نه یواځې د افغانستان لپاره مهم ده، بلکې د سیمې هېوادونو لپاره هم یو ښه زیری دی.