د کانونو او پټرولیم وزارت مالي او اداري مرستیال نورستان ولایت ته سفر وکړ
د کانونو او پټرولیم وزارت د رهبرۍ د پرېکړې او د چارو د لا اغېزمن تنظیم په موخه، د وزارت د مالي او اداري چارو مرستیال مولوي حسامالدین صابري په مشرۍ یو ځانګړي پلاوي نورستان ولایت ته سفر وکړ.
یاد پلاوی د ختیځ زون د ولایتي ریاستونو د فعالیتونو او اداري بهیرونو د هر اړخیزې ارزونې لپاره ټاکل شوی، چې د خپل رسمي کاري سفر په لړ کې به د نورستان د کانونو ریاست فعالیتونه، پرمختګونه او شته ستونزې له نږدې و ارزوي، څو د یاد ریاست چارې لا منظمې او اغیزمنې شي.
دغه ارزونه د وزارت د نافذه پالیسۍ، لارښوونو او ټاکل شوو اصولو په رڼا کې ترسره کېږي، چې پکې تخنیکي، اداري، مالي، الکترونیکي سیستمونه، د صحت اصول، سروې او نورې اړوندې مسلکي برخې شاملې دي.
د ارزونې بنسټیزه موخه دا ده، چې د ریاست د ظرفیتونو د پیاوړتیا، د شته ستونزو د حل، د چارو د معیاري کېدو او د راتلونکو پرمختیایي پلانونو د پلي کولو لپاره لازم ګامونه پورته شي.
