د تخنيکي پلټنې رئيس د ولایتونو د کانونو قراردادي شرکتونو له استازو سره وکتل

د کانونو او پټرولیم وزارت د کانونو د تخنيکي پلټنې رئيس حافظ انجنیر عبداللطيف خالد د تخار، سمنګان او غور ولایتونو د لوی او کوچني مقیاس کانونو قراردادي شرکتونو له استازو سره چې تخنيکي ټيم د یادو ولایتونو د کانونو څېړنه ترسره کړې وه د یادې څېړنې وروسته یې د قراردادي شرکتونو له استازو سره ناسته وکړه. په دې ناسته کې د تخنيکي پلټنې رئيس او تخنيکي ټيم له لوري شرکتونو سره په قراردادونو کې د شته ژمنو په اړه خبرې وشوې. د تخنيکي ټیم د څېړنې په ترڅ کې کومې ستونزې او نواقص چې قراردادي شرکتونو د ژمنو په تخنيکي، مدیریتي برخو کې لرل، شرکتونو ته د پريزنټيشن په بڼه وړاندې شول او شرکتونو ته د تخنيکي پلټنې رئيس له لوري د شته تعهداتو او نواقصو په اړه لازمې سپارښتنې وشوې، تر څو شرکتونه خپلې ژمنې د قرارداد او پروپوزل اړوند په ټاکل شوي وخت کې سرته ورسوي.
د قراردادي شرکتونو استازو ژمنه وکړه، چې مونږ به خپله هڅه او کوښښ وکړو، ترڅو د قرارداد اړوند خپلې ژمنې په ټاکل شوي وخت کې سرته ورسوو.
په پای کې د قراردادي شرکتونو استازو د تخنيکي پلټنې رئيس څخه د خپلو ستونزو د حل په برخه کې د همکاریو غوښتنه وکړه. نوموړي ډاډ ورکړ چې د کانونو او پټرولیم وزارت له رهبري سره به یې غوښتنې شریکې شي.