د بادغیس ولایت د ګچو په کانونو کې په سلګونو کسان په کار بوخت دي
د بادغیس ولایت په مقر، سنګ اتش ولسوالیو کې د ګچو په کانونو او د پروسس په کارخونو کې سلګونو کسانو ته د کار زمینه برابره شوې ده.
بادغیس ولایت د هېواد د هغو ولایتونو له جملې څخه دی، چې د ګچو کانونو پراخه زېرمې لري، چې اوس مهال د پنځو شرکتونو له لوري د ګچ ډبرو کانونو د استخراج چارې روانې دي، چې په دې سره به نه یواځې افغانستان د ګچو د تولید په برخه کې په ځان بسیا شي بلکې نورو هېوادونو ته به هم په نږدې راتلونکې کې صادرات ولرو، ددغو ګچو ځینې نمونې ترکمنستان هېواد ته هم صادرې شوي دي، د مسوولینو پر وینا دغه ګچ ډبرې خورا د لوړ کیفیت درلودونکې دي.
د غه راز د یادو شرکتونو مسوولینو وویل چې د ګچو کانونو د استخراج په پراختیا سره به د ټولنیزو خدمتونو په برخه کې هم کار وکړي سربېره پر دې به ګڼ شمېر نور ځوانان هم د کانونو د استراج او پروسس په برخه کې په کار بوخت شي.
