کانونو او پټرولیم وزارت 10 د کوچنۍ کان کېندنې جوازونه داخلي شرکتونو ته ورکړل
کانونو او پټرولیم وزارت 10 د کوچنۍ کان کېندنې جوازونه داخلي شرکتونو ته د قانون د احکامو په رڼا کې نن ورځ مخکې له غرمې داخلي شرکتونو ته ورکړل.
په هغو مراسمو کې چې نن ورځ د کانونو او پټرولیم وزارت د کنفرانسونو په تالار کې نیول شوي ؤ، د کانونو وزارت سرپرستوزیر ښاغلي عنایتالله مومند لخوا 10 د ودانیزو توکو د کوچنۍ کانکېندنې جوازونه چې د هرات، غور، دایکندی او بلخ ولایتونو اړوند ؤ، داخلي شرکتونو ته ورکړل.
په دغو مراسمو کې د کانونو او پټرولیم وزارت د سروېجیولوژی او د پلانونو او پالیسیو مرستیالانو، رئیسانو او د خصوصي شرکتونو استازو ګډون کړی ؤ. د کانونو او پټرولیم وزارت سرپرست راغلو ګډون والو ته د ښه راغلاست ویلو ترڅنګ داسې وو ویل، «څرنګه چې د کاني قراردادونو داوطلبۍ پروسه د کانونو د نوي قانون په رڼا کې ترسره شوي، نو په همدې موخه خصوصي سکتور چاپیریال ساتنې او ټولنیزو معیارونو ته جدي پاملرنه کوي او د کانونو وزارت سره خپلو ترسره کړو ژمنو ته ژمن دي».
همدارنګه د کانونو وزارت سرپرستوزیر زیاته کړه چې بعضې نور د کان کېندنې قراردادونه د اقتصاد عالي شورا ته وړاندې شوي، چې ډېر زر به تصویب شي.
په آخر کې نوموړي برنامه د کانونو او پټرولیم وزارت سرپرست لخوا خصوصي سکټور مسؤولینو ته د جواز په ورکولو سره پای ته ورسیده.
