د افغان تاجک نفتي حوزې اړوند درې بلاکونو سایزمیکي سروې پیل شوه
د کانونو او پټرولیم وزارت او ازبېک آویزسیز جیولوجیکي کمپنۍ تر منځ د هوکړه لیک پر بنسټ نن د افغان تاجک حوزې اړوند محمدجان ډګر، احمد آباد او شمر بلاکونو سایزمیکي دوه بعدي سروې د یادې کمپنۍ له لوري پیل شوه.
په دغه مناسبت نن سه شنبه په مزارشریف ښار کې جوړه شوې غونډه کې د کانونو او پټرولیم وزارت ویاند همایون افغان، د هایدروکاربونو د سروې رئیس عبدالخلیل حنفي، د بلخ ولایت د مقام مرستیال مولوي نورالهادي ابو ادریس، په مزارشریف کې د ازبکستان قونسلګرۍ لومړي سکرتر ښاغلي شوکت، د ازبېک آویزسیز جیولوجي کمپنۍ مشر ښاغلي خیت بای امانوف، درسنیو استازو او یو شمېر ځایي مسوولینو ګډون کړی وو.
غونډه د قران مجید په څو مبارکو آیتونو پیل شوه، ورپسې د کانونو او پټرولیم وزارت ویاند راغلو مېلمنو ته د ښه راغلاست تر څنګ وویل د دوست او ګاونډي هېواد ازبکستان د ازبېک آویزسیز جیولوجیکي کمپنۍ له لوري د افغان تاجک حوزې د درې بلاکونو وړیا سایزمیکي دوه بعدي سروې د دواړو هېوادونو په قوي اړیکو، د ازبکستان په حسن نیت، ښه ګاونډیتوب او د کانونو او پټرولیم وزارت د مشرتابه د ښه او ګټور مدیریت ښکارندویي کوي، ښاغلي افغان همدا راز زیاته کړه، چې افغانستان پراخې او بډایې کاني زېرمې لري او موږ د دغې سترې الهي ډالۍ د اغېزمن مدیریت لپاره کلک هوډ، ښه پلانونه او عملي ګامونه لرو، څو دا شتمني د هېواد د تلپاتې پرمختګ سبب وګرځي. سربېره پردې د کانونو او پټرولیم وزارت د هایدروکاربونو د سروې رئیس ښاغلي عبدالخلیل حنفي د یاد هوکړه لیک او افغان تاجک حوزې په اړه ګډونوالو ته معلومات وړاندې کړل زیاته یې کړه افغان تاجک حوزه د هېواد په شمال کې د نفتو یو ستره تثبیت شوې حوزه ده چې د ازبېک آویزسیز جیولوجیکي کمپنۍ له لوري به یې د ټولو یولسو بلاکونو څخه یواځې د محمد جان ډګر، احمد آباد او شمر بلاکونو چې په ټولیزه توګه ۷۶۱۷ کیلومټره مربع مساحت لري د سایزمیکي دوه بعدي سروې ترسره شي.
دغه راز د مزارشریف مرستیال والي د یادې پروژې د چارو د پیل په اړه خوښي څرګنده کړه او له خپله لوري یې د هر اړخیزو همکاریو ډاډ ورکړ نوموړي زیاته کړه چې په افغانستان کې د پانګونې او لویو پروژو د پلي کولو لپاره ښه زمینه برابره شوې ده.
په پای کې د ازبېک آویزسیز جیولوجيکي کمپنۍ رئیس خیت بای امانوف وویل موږ چمتو یو، چې له افغانانو سره ګډ کار وکړو او د ازبکستان هېواد پالیسي داده، چې له افغانانو سره د ښه ګاونډیټوب تر څنګ هر اړخیزو همکاریو ته دوام ورکړو.
