محمد عتیق ذکي: هغو ښځو ته چې د کان کیندنې په برخو کې تخصص لري، د وزارت په نوي تشکیل کې پراخ فرصتونه برابریږي
د کانونو او پټرولیم وزارت د پالیسۍ او استخراجي برنامو معین محمد عتیق ذکی، د جنډر د واحد د همغږۍ په غونډه کې چې د دې وزارت د جنډر آمریت لخوا ترسره شوه، ګډون او وینا وکړه. په دې غونډه کې، د ښځو د وزارت او نړیوال بانک استازو او د دولتي ادارو د جنډر د برخې رئیسانو او آمرینو ګډون درلود.
د کانونو او پټرولیم وزارت د پالیسۍ او استخراجي برنامو معین محمد عتیق ذکي په خپلو خبرو کې وویل: هغو ښځو ته چې د کان کیندنې په برخو کې تخصص لري، د وزارت په نوي تشکیل کې پراخ فرصتونه برابریږي.
محمد عتیق ذکي زیاته کړه: له نېکه مرغه، د کانونو او پټرولیم وزارت د جنډر آمریت، د جنډر د ۵۲ واحدونو سره اوږه په اوږه د جنډر د تساوي او پرمختګ لپاره فعالیت ترسره کوي. دې آمریت هڅه کړې، خپلې هغه برنامې چې د جنډر د پراختیا په برخه کې اغېزمنې ثابتیږي، په خورا موثریت تطبیق کړي.
د غونډې په لړ کې، د ښځو چارو وزارت د نظارت او ارزیابۍ برخې رئیسې نفیسه کوهستاني هم خبرې وکړې او د جنډر پراختیا ته د پاملرنې له کبله یې د کانونو او پټرولیم وزارت د رهبرۍ له پاملرنې مننه وکړه.
همداراز، د کانونو او پټرولیم وزارت د جنډر د آمریت د چارو او د شکایت اورېدلو الکترونیکي میکانیزم د معرفي په اړه پریزینټیشن هم د دې وزارت د جنډر د برخې مسئولینو لخوا وړاندې شو.
