د کندهار ولایت د مرمر ډبرو تړون د ۶.۲ میلیونو ډالرو په ارزښت لاسلیک شو
د کانونو او پټرولیم وزارت سرپرست الحاج ملاهدایت الله بدري د کندهار ولایت د شاه ولي کوټ ولسوالۍ د دره نور سیمې د مرمر ډبرو کان تړون د ترکیې هېواد د امي اوغلو د استخراج، پروسس او سوداګریز شرکت له مرستیال موسی امي اوغلو سره د ۶.۲ میلیونه ډالرو په ارزښت د ۳ کیلو مټره مربع په مساحت سره د ۳۰ کلونو لپاره د پلان او پالیسي مرستیال شیخ ضیاءالرحمن الاریوبي، د وزارت ستر سلاکار انجنیر وحیدالله حلیمي یوشمېر رئیسانو او رسنیو په شتون کې د سه شنبې په ورځ د ۱۴۰۳/۱۱/۲۳ نېټې د وزارت د غونډو په تالار کې لاسلیک کړ.
یاده غونډه د قرانکریم د څو مبارکو ایا تونو په تلاوت سره پیل شوه ورپسې د وزارت سرپرست ګډونوالو ته د ښه راغلاست تر څنګ دیاد کان د تړون په اړه معلومات وړاندې کړل ویې ویل: خوښ یم چې نن د یوسترې پروژې چې د کندهار ولایت په دره نور سیمې کې موقعیت لري تړون یې له ترکي شرکت (امي اوغلو) سره لاسلیک کوو. د دې تړون په لاسلیک سره به د هېواد سلګونو ځوانانو ته کاري فرصتونه برابر شي او د ټولنیزو خدمتونو په برخه کې به د سیمې خلکو ته د طبي او تعلیمي برخو سربېره نور ګڼ شمېر ټولنیز خدمات وړاندې شي.
د امي اوغلو شرکت مرستیال هم د دې پروژې د اهمیت په اړه خبرې وکړې او د افغانستان اسلامي امارت، په ځانګړې توګه د کانونو او پټرولیم وزارت له مشرتابه څخه یې مننه وکړه، زیاته یې کړه: د استخراج او پروسس وروسته به موږ د افغانستان مرمر نړۍ ته معرفي کړو، چې دا د دواړو هېوادونو خلکو او حکومتونو په ګټه ده.
