د کانونو او پټرولیم وزارت د هایدروکاربن (نفت او ګازو) پروژو په اړه د لوړې کچې شریکانو په میاشتنۍ ناسته کې د پروژو په سرعت او د شریکانو په همغږۍ ټينګار وکړ
دکانونو او پټرولیم وزارت سرپرست محمد هارون چخانسوري د ویډیو کنفرانس له لارې د لوړې کچې شریکانو په میاشتینۍ ناسته کې ګډون وکړ. پدې ناسته کې له شبرغان څخه تر مزار شریف پورې د ۹۴.۵ کیلومتره ګازو پایپ لاین، د ګازو د پروژو د امنیت په موخه د عامه محافظت ملي ځواکونو د تشکیل سربېره، د افغان ګاز د تجهیزاتو تدارکاتي پروسو په اړه هم خبرې او بحث وشو.
دکانونو او پټرولیم وزارت سرپرست وزیر محمد هارون چخانسوري وویل" مونږ به له ټولو شریکانو سره دپیاوړې همغږۍ مسئولیت واخلو ترڅو یادې پروژې په خپل وخت سره تطبیق شي؛ او ټينګار یې وکړ چې دیادو پروژو په ټولو برخو کې د موثریت او لازم شفافیت سره تحرک ایجادولو ته زمینه برابروو.
پدې ناسته کې، په زېربنایي چارو کې د ولسمشر سلاکار محمد همایون قیومي او په حقوقي چارو کې د ولسمشر د ستر سلاکار د دفتر استازو په ګډون د افغانستان د مالیې وزارت، برېښنا شرکت، نړیوال بانک استازو او د غضنفر ګروپ شرکت استازو ګډون درلود.
