بدخشان ولایت ته د کانونو او پټرولیم وزارت سرپرست رسمي سفر
د کانونو او پټرولیم وزارت سرپرست الحاج ملا هدایت الله بدري په داسې حال کې چې مالي او اداري مرستیال مولوي حسام الدین صابري یې ملتیا کوي د یو رسمي سفر په ترڅ کې په بدخشان ولایت کې یې د بېلابېلو کتنو په ترڅ کې د وسله وال پوځ له لوی درستیز قاري فصیح الدین فطرت، د ۲۱۷ عمري قول اردو قومندان مولوي امان الدین منصور، د والي مرستیال قاري امین الله طیب، امنیه قومندان الحاج ملا عزیزالله او ټولو سیمه ییزو مسوولینو سره یې وکتل.
په دغو ناستو کې د کانونو او پټرولیم وزارت سرپرست په خپلو خبرو کې د کانونو د قاچاق او غیر قانوني استخراج پر مخنیوي ټینګار وکړ او د بدخشان ولایت د چارواکو د لا زیاتې همغږۍ او همکارۍ غوښتنه یې وکړه.
د کانونو او پټرولیم وزارت سرپرست د دغه ولایت شهربزرګ ولسوالۍ ته د خپل سفر په ترڅ کې د زرشويي کان د استخراج له سیمو څخه لیدنه وکړه او د شرکتونو له مسوولینو او ځايي خلکو سره یې په لیدنه کې ټینګار وکړ چې په هیڅ صورت کې به د کانونو غیر قانوني استخراج ته اجازه ورنکړي او ټول شرکتونه مکلف دي چې د قانون او طرزالعمل سره سم ژر تر ژره اجازه لیکونه او یا هم تړون وکړي، نوموړي په خپلو خبرو کې کان کیندونکو ته وویل د کانونو او پټرولیم وزارت د کانونو د استخراج او مسلکي کولو لپاره یوه هر اړخیزه کړنلاره جوړه کړې او د لازیاتو اسانتیاوو په موخه به کان کیندونکي د کابل پر ځای د بدخشان ولایت د کانونو له ریاست څخه خپل جوازونه ترلاسه کړي.
په پای کې یې زیاته کړه: هيچا ته به اجازه ورنکړل شي چې غير قانوني استخراج وکړي او له متخلیفینو سره به قانوني چلند وشي.
