د کونړ ولایت د نفرایټ ډبرو کانونو تخنیکي ارزونه ترسره شوه
د کانونو او پټرولیم وزارت تخنیکي ټیم له لوري د کونړولایت په بېلابېلو سیمو کې د نفرایټ ډبرو کانونو هراړخیزه تخنیکي ارزونه ترسره شوه، چې موخه یې د یادو کانونو معیاري استخراج او روانو فعالیتونو ارزول وو.
په دې لړ کې د خاص کونړ ولسوالۍ د C او D بلاکونه، د کوز چنچن لومړی او دویم، د سپینکې ولسوالۍ د E بلاک، د ادرو تنګي او د چنچن ناو لومړۍ سیمې له نږدې وکتل شوې.
تخنیکي پلاوي په یادو سیمو کې د کانکېندنې روان وضعیت، د ډبرو کیفیت، د استخراج مېتودونه او د چاپېریال ساتنې اصولو په پام کې نیولو باندې ټینګار وکړ.
همدارنګه پلاوي د اړوندو شرکتونو او د کانونو مسوولینو ته لازمې سپارښتنې وکړې، څو د معیاري استخراج، د کار خوندیتوب او د کاني سرچینو د ساتنې اصول په ښه توګه ترسره کړي.
یاده ارزونه د دې لپاره ترسره شوه، څو د کانونو فعالیتونه لا منظم، شفاف او د هېواد د اقتصاد د پیاوړتیا لپاره اغېزمن تمام شي.
