د کانونو او پټرولیم وزیر د سیتوایا کمپنۍ څخه لیدنه وکړه
د کانونو او پټرولیم وزیر الحاج ملا هدایت الله بدري د لوړ پوړي پلاوي په مشرۍ، چې د امارتي شرکتونو عمومي رئیس مولوي احمد جان بلال یې هم ملتیا کوله د تاتارستان پلازمېنې کازان کې د برېښنايي توکو او مېټرونو د تولید سیتوایا کمپنۍ څخه لیدنه وکړه.
په دې لیدنه کې د امارتي شرکتونو عمومي رئیس د افغانستان د برېښنا شبکې په اړه د یادې کمپنۍ رهبرۍ ته معلومات ورکړل او غوښتنه یې وکړه تر څو د مېټرونو د الکټرونیکي کولو او واحدې شبکې په جوړولو کې ګډ کار وکړو، د نوموړې کمپنۍ مشرتابه پلاوي په یادو برخو کې خپله لېوالتیا څرګنده کړه او ژمنه یې وکړه، چې له افغان تخنیکي انجینرانو سره تر کتنې وروسته به هڅه وکړو ترڅو په افغانستان کې یو تخنیکي ورکشاپ جوړکړو. همدا راز یاد پلاوي د هیمګران صنعتي پارک څخه هم کتنه وکړه.
د کانونو او پټرولیم وزیر د خپل سفر په ترڅ کې د کازان د انرژۍ پوهنتون څخه د لیدنې پر مهال یې د افغان محصلینو ستونزې او وړاندیزونه واورېدل او د همکارۍ ډاډ یې ورکړ، نوموړي د پوهنتون له استازو غوښتنه وکړه، چې د برېښنا او نفتو په برخو کې د افغان انجینرانو د مسلکي وړتیاوو د لوړولو په برخه کې همکاري وکړي، د یاد پوهنتون مشرتابه پلاوي په انلاین او حضوري توګه د زده کړو په برخه کې د همکاریو ډاډ ورکړ.
