د ټاپي پروژې رغنیزې چارې په چټکتیا سره روانې دي
د افغانستان په خاوره کې د ټاپي ګازو نللیکې پروژې د پلي کېدو چارې په چټکۍ سره روانې دي. دا مهال د پروژې په بېلابېلو برخو کې د مسیر چمتو کول، د نللیکو او اړینو تجهیزاتو لېږد، د جرونو کیندنه، د نللیکو وېلډینګ او د نللیکو خښولو چارې په منظم ډول دوام لري.
د وروستیو پرمختګونو له مخې تر اوسه د نللیکې ۱۰۱ کیلومټره نللیکه غځول شوې او ۱۲۶ کیلومټره مسیر( دهلیز) چمتو شوی او همدارنګه ۱۰۸ کیلومټره نښلوونکی د څارنې سړک جوړ شوی دی. سربېره پر دې د نللیکې د خښولو لپاره د ۷۰.۲ کیلومټرو په اوږدوالي جرونه کیندل شوي او تر دې دمه شاوخوا ۳۶ کیلومټره نللیکه تر ځمکې لاندې خښه شوې ده.
د پروژې د راتلونکو پړاوونو د چټک پلي کېدو په موخه، ۸۹.۵ کیلومټره نورې نللیکې هم د پروژې ساحې ته لېږدول شوې دي، څو د رغنیزو چارو بهیر لا چټک پرمخ ولاړ شي.
د ټاپي د ګازو نللیکې پروژه د افغانستان له مهمو ستراتیژیکو او اقتصادي پروژو څخه ده، چې په بشپړېدو سره به د انرژۍ د لېږد، د ترانزیټي عوایدو د زیاتوالي، د کارموندنې فرصتونو د رامنځته کېدو او اقتصادي ودې په برخه کې مهم رول ولوبوي.
