د پلان او پالیسي مرستیال له ایراني پانګوالو سره وکتل
د کانونو او پټرولیم وزارت د پلان او پالیسۍ مرستیال شیخ الحدیث ضیاء الرحمن الاریوبي د یکشنبې په ورځ د ١٤٠٣/١١/٧ نېټې د ایران او افغانستان د کانونو صنایع او سوداګرۍ ګډې خونې د هيئت رئیس محمود سیادت، دایران د سوداګرۍ خونې د نړیوالو چارو مرستیال سید حامد عسکري او مل پلاوي سره د وزارت د غونډو په تالار کې وکتل او د هېواد دکانې زېرمو په برخه کې یې د پانګونې په اړه بحث او خبرې وکړې، دغه راز یې د کان کیندنې او اکتشاف په برخه کې د وزارت د کارکوونکو د ظرفیت لوړولو په موخه یې د همکاریو ژمنه وکړ.
ښاغلي سیادت د خپل هېواد دکان کیندنې شرکتونو د کاري تجربې په اړه لنډ معلومات وړاندې کړل او د اوسپنې، مرمر، ډبرو سکرو، تالک، سرب او جست، ګرانیټ او سینګاري ډبرو په کانونو کې یې د پانګونې لېوالتیا څرګنده کړه.
د پلان او پالیسي مرستیال د هغوی د لېوالتیا په اړه خوښي څرګنده کړه د کان کیندنې د قانون او کړنلارې مطابق يې ورسره د لازمو همکاریو ژمنه وکړه او د افغانستان د کاني سرچینو په برخه کې د پانګونې لپاره د یوې ګډې کمېټې د جوړولو غوښتنه یې وکړه.
