د نفت او ګازو(هایدرو کاربنونو) د قانون د تسوید بین الوزارتي غونډه ترسره شوه
یکشنبه په ۹/۷/۱۴۰۲ نېټې د کانونو او پټرولیم وزارت په مقر کې د پلان او پالیسي مرستیال په مشرۍ د نفت او ګازو(هایدرو کاربنونو د قانون د تسوید کمېټې لومړنۍ بین الوزارتي غونډه ترسره شوه. یاده کمېټه چې د اسلامي امارت د امیر المومنین حفظه الله د (۹)۲۸/۳/۱۴۴۴ ګڼې فرمان د لومړۍ مادې د دویم جزء په رڼا کې د ذیدخلو وزارتونو/ادارو (کانونو او پټرولیم، مالیې، کرنې اوبو لګولو او مالداری، اطلاعات او فرهنګ، صنعت او سوداګري وزارتونو او د چاپیریال ساتنې او د نورم او ستندرد ادارو) د مسلکي، تجربه لرونکو، تخصصي او علماوو استازو په ګډون د کانونو او پټرولیم وزارت د مقام د حکم مطابق جوړه شوې وه.
لومړنۍ غونډه د قران کریم په تلاوت سره پیل شوه چې لومړی د پلان او پالیسي مرستیال ښاغلي شیخ الحدیث ضیاء الرحمن الاریوبي د تقنیني اسنادو او پالیسیو د جوړولو او تطبیق برخه کې د وزارت او اسلامي امارت ژمنتیا او د هغو د ګټو په اړه خپله هر اړخیزه وینا وکړه ، ورپسې د حقوقو عمومي ریس مولوی سعید احمد بهرمند د تقنیني اسنادو جوړولو برخه کې د دې وزارت لاس ته راوړنو په اړه معلومات شریک کړل او د تقنینی اسنادو شتون او ضرورت په اړه یې وینا وکړه.
وروسته د دې کمېټې غړو د نفت او ګازو (هایدرو کاربنونو ) قانون د تسوید لپاره خپل نظریات او وړاندیزونه شریک کړل او د یاد قانون د مسودې ترتیبولو برخه کې یې د قانون جوړونې اصولو او روشونو ته په کتو پیل وکړ.
