محمد هارون چخانسوري: موږ خپلې برنامې د شفافیت، د کاري فرصتونو د ایجادولو او د ملي عوایدو د لوړوالي اصل ته په پاملرنې، د کانونو د لارې د نقشې پر بنسټ طرحه کوو
د کانونو او پټرولیم وزیر محمد هارون چخانسوري ملت ته د دولت د حساب ورکړې په برنامه کې چې د حکومت د اطلاعاتو او رسنیو په مرکز کې ترسره شوه، د سروې جیولوجي، د کانونو او نفت او ګازو د قراردادونو د ورکړې، د قوانینو او پالیسیو د پراختیا او د اداري فساد پر وړاندې د مبارزې په برخو کې د کانونو او پټرولیم وزارت د لاسته راوړنو په هکله توضیحات ورکړل.
محمد هارون چخانسوري وویل: د کانونو او پټرولیم وزارت په ۱۳۹۹ کال کې ۲،۴ میلیارد افغانۍ عواید د مرکز او ولایتونو په کچه د ۹۵ قراردادونو له مدیریت څخه ترلاسه کړي چې په دې کال کې د وزارت لپاره د ټاکل شوي هدف څخه زیات دي.
د کانونو او پټرولیم وزیر د ۱۳۹۳ کال څخه تر ۱۳۹۹ کال پورې د مقروضیتونو د راټولولو په هکله چې ۱۱۸ میلیون افغانۍ کیږي، د وزارت د نوې رهبرۍ له اقداماتو څخه هم یادونه وکړه.
محمد هارون چخانسوري د سروې جیولوجي فعالیتونو ته په اشارې وویل: د کانونو او پټرولیم وزارت په مجموعي ډول په ۱۳۹۹ مالي کال کې په ۱۶ ولایتونو کې د کوچني او ستر مقیاس ۲۰۱ ساحې تثبیت کړي چې د ساختماني موادو، د تزئیناتي ډبرو، نفرایت، پولي میتال او مسو درلودونکې دي.
د کانونو او پټرولیم وزیر د کان کیندنې شرکتونو ته د لوی مقیاس د ۲ پروژو د قراردادونو د ورکړې، د تزئیناتي ډبرو او ساختماني موادو د ۱۶ جوازونو د صادرولو او د اقتصاد عالي شورا لخوا د جواز ورکړې په موخه د کان کیندنې د ۳۱ خودسرانه ساحو په شمول د ۶۷ ساحو د منظورۍ په اړه معلومات وړاندې کړل.
هغه زیاته کړه: د کوچني مقیاس ۳۷ جوازونه طی مراحل او لاسلیک شوي. دغه جوازونه د ساختماني ډبرو، شګې او جغل او مرمر او تراورتین د کانونو درلودونکي دي چې کلني عواید یې ۲۴۰ میلیون افغانۍ او ۱۰۰۰ کسانو ته په مستقیم ډول د کار فرصت مساعدوي.
د کانونو او پټرولیم وزیر په ځینو قراردادونو کې د حقوقي ستونزو او د حل لپاره یې د وزارت د اقداماتو په اړه هم خبرې وکړې. هغه د افغانستان د نفت او ګازو د ساحو او په دې ساحو کې د شته ظرفیتونو، د ټاپي پروژې، له شبرغان څخه مزارشریف ته د ۹۴،۵ کیلومترو په اوږدوالي د ګازو د پایپ لاین پروژې، د قوانینو او پالیسیو د تطبیق، د اداري فساد پر وړاندې د مبارزې، اداري اصلاحاتو او د ۱۴۰۰ مالي کال لپاره د وزارت د پلان شویو برنامو په اړه هراړخیز معلومات وړاندې کړل.
محمد هارون چخانسوري د جوزجان ولایت په یتیم تاق سیمه کې د ګازو د 32A او 36 شمېرې دوه څاګانو د کیندنې، د شبرغان په ګاز لرونکې ساحه کې د ۳۰ فعاله ګازي څاګانو او په راتلونکي مالي کال کې د ۵ نویو ګاز لرونکو څاګانو په اړه هم توضیحات وړاندې کړل.
محمد هارون چخانسوري د کان کیندنې په قراردادونو کې د شفافیت د تامین او د وزارت په پروژو کې د تحرک ایجادولو ته په اشارې وویل: موږ خپلې برنامې د شفافیت، د کاري فرصتونو د ایجادولو او د ملي عوایدو د لوړوالي اصل ته په پاملرنې، د کانونو د لارې د نقشې پر بنسټ طرحه کوو.
