د کانونو او پټرولیم وزارت د پولي تخنیک له ظرفیتونو څخه د کانونو په سکتور کې د تحرک د ایجادولو لپاره ګټه اخلي
د کانونو او پټرولیم وزارت د کانونو په سکتور کې د لازم تحرک د ایجادولو او د افغانستان د بشري پانګې له تجربو څخه د ګټه اخیستنې په خاطر، د کابل پولي تخنیک له یو شمېر پخوانیو او اوسنیو استادانو سره مشورتي قراردادونه لاسلیک کړل.
د پولي تخنیک له استادانو سره د تړون موخه، د دوی له علمي پانګې څخه د عوایدو د لوړولو او د تحرک د ایجادولو لپاره لازمه ګټه اخیستل دي.
نن سهار د وزارت د رهبرۍ او د پولي تخنیک د استادانو ترمنځ تعارفي او تخنیکي ناسته ترسره شوه.
دوی به وزارت ته د منرالونو او د ګازو او نفتو په برخه کې د شته معلوماتو په رڼا کې د تحرک د ایجادولو لپاره لازمې مشورې ورکوي ترڅو په نتیجه کې یې د عوایدو ډېرښت، کارموندنې او د کانونو په سکتور کې ولسي مشارکت او د خصوصي سکتور فعالې ونډې ته زمینه مساعده شي.
