محمد هارون چخانسوري: د کانونو په سکتور کې د تحرک ایجادول، زموږ بنسټي موخه ده
د کانونو او پټرولیم وزیر محمد هارون چخانسوري، نن سهار په کابل کې د چین سفیر وانګ یو او د مس عینک پروژې د قراردادي شرکت له غړو سره په خپل کاري دفتر کې وکتل. په دغه کتنه کې د مس عینک په پروژه کې د تحرک د رامنځته کولو په موخه د وروستیو پرمختګونو په اړه بحث او خبرې وشوې.
د کانونو او پټرولیم وزیر محمد هارون چخانسوري وویل: د کانونو په سکتور کې د تحرک ایجادول زموږ بنسټي موخه او د مس عینک د پروژې د ستونزو حل، زموږ له عمده لومړیتوبونو څخه دي. د افغانستان حکومت ژمن دی چې دا پروژه ژر تر ژره ګټه اخیستنې ته وسپاري ترڅو عملي کار یې پیل او خلکو ته د کار زمینې مساعدې شي.
د کانونو او پټرولیم وزیر وویل: افغانستان له چین سره غوره اوږدمهاله تاریخي، فرهنګي او اقتصادي اړیکې لري او د دغو اړیکو لا زیاتې پراختیا ته ژمن دی.
په کابل کې د چین سفیر وانګ یو د مس عینک په پروژه کې د ستونزو د حل کولو لپاره د کانونو او پټرولیم وزارت د مشرتابه له ځانګړې پاملرنې مننه وکړه.
همداراز، د مس عینک پروژې د قراردادي شرکت استازو د خپلو فعالیتونو په هکله د ګزارش د وړاندې کولو ترڅنګ، د پروژې په چارو کې د پرمختګ لپاره د خپلو همکاریو ډاډ ورکړ.
