محمد عتیق ذکي: په دیموکراتیکو نظامونو کې، اطلاعاتو ته لاسرسی د غوره حکومتدارۍ له مهمو عناصرو څخه ګڼل کیږي
اطلاعاتو ته د لاسرسي د قانون په هکله د پوهاوي برنامه د کانونو او پټرولیم وزارت د پالیسۍ او د استخراجي برنامو د تسهیل معین محمد عتیق ذکي، اطلاعاتو ته د لاسرسي کمیسیون کمیشنر حمدالله ارباب، د یاد کمیسیون د استازو او د کانونو او پټرولیم وزارت د کارکونکو په ګډون ترسره شوه.
د کانونو او پټرولیم وزارت د پالیسۍ او د استخراجي برنامو د تسهیل معین محمد عتیق ذکي وویل: په دیموکراتیکو نظامونو کې، اطلاعاتو ته لاسرسی د غوره حکومتدارۍ له مهمو عناصرو څخه ګڼل کیږي. اطلاعاتو ته د لاسرسي د حق له تامینولو پرته، هېڅ هېواد د اداري فساد پر وړاندې د مبارزې، د ځواب ویلو د اصل د پیاوړتیا او په خپل جوړښت کې د رونټیا لپاره کوټلي اقدامات نه شي ترسره کولی. له همدې امله، اطلاعاتو ته لاسرسی زموږ د هر هېوادوال حق او اطلاعاتو ته د لاسرسي تامینول، د هرې حکومتي ادارې مسئولیت دی.
محمد عتیق ذکي، اطلاعاتو ته د لاسرسي د قانون د تطبیق په برخه کې د وزارت د برنامو په اړه هم هراړخیز معلومات وړاندې کړل.
اطلاعاتو ته د لاسرسي کمیسیون کمیشنر حمدالله ارباب، د اطلاع رسونې په برخه کې له یاد کمیسیون سره د کانونو او پټرولیم وزارت له همکارۍ مننه وکړه او دغه وزارت یې اطلاعاتو ته د لاسرسي د قانون د تطبیق په برخه کې له ځواب ویونکو ادارو څخه یاد کړ.
هغه زیاته کړه: دولتي ادارې خلکو ته د خدماتو د عرضه کولو مسئولیت په غاړه لري او مکلف دي چې خلکو ته په دې اړه ځواب ووایي.
د غونډې په لړ کې، د کانونو او پټرولیم وزارت کارکونکو ته د کمیسیون د غړو لخوا، اطلاعاتو ته د لاسرسي د قانون په اړه پریزنټیشن وړاندې شو.
