د کانونو د تخنیکي کمېټې د غړو د ټاکنې لپاره د غوراوي کمېټې غونډه ترسره شوه
په دغه غونډه کې چې د کانونو او پټرولیم وزارت د سرپرست محمد هارون چخانسوري په مشرۍ ترسره شوه او موخه یې د کانونو د تخنیکي کمېټې د غړو ټاکنه ده، د دغه وزارت د مسئولینو سربېره، د جمهوري ریاست د چارو ادارې، د مالیې او اقتصاد وزارتونو او د اداري اصلاحاتو او ملکي خدماتو کمیسیون غړو ګډون درلود.
د کانونو او پټرولیم وزارت سرپرست محمد هارون چخانسوري د ظرفيت په پام کې نیولو سره په ټينګار وويل: زموږ موخه، د هېواد د ملي ګټو او د کانونو د سکتور د اړتیاو په پام کې نېولو سره د ظرفیت لرونکو اشخاصو تعینول دي.
په غونډه کې پرېکړه وشوه چې د کانونو د تخنیکي کمېټې د بستونو د استخدام د لړۍ پړاونه دې د اداري اصلاحاتو او ملکي خدماتو د کمیسیون په همکارۍ ترسره شي.
د یادونې وړ ده چې د کانونو تخنیکي کمېټه پنځه تنه غړي لري چې له حقوقي، مالي او جیولوجي/کان کیندنې له برخو څخه ګومارل کیږي.
