د کانونو او پټرولیم وزارت سرپرست: زموږ بنسټي موخه، خپلو دردېدلو هېوادوالو ته د صادقانه خدماتو وړاندې کول دي.
د کانونو او پټرولیم وزارت سرپرست شیخ الحدیث شهاب الدین دلاور نن سهار په خپل کاري دفتر کې د مرکز او ولایتونو له مرستیالانو او رئیسانو سره وکتل. په دې ناسته کې په کاري قاطعیت، د هراړخیزه او صادقانه خدماتو په وړاندې کولو ټینګار وشو.
د کانونو او پټرولیم سرپرست وزیر په خپلو خبرو کې وویل: «موږ دروند مسوولیت په غاړه لرو. د هراړخیز او صادقانه خدماتو وړاندې کول د هیواد د اقتصادي پراختیا او د ملي عوایدو د کچې د لوړېدو سبب ګرځي. مو باید یو مرکزي سیستم ولرو ترڅو ټول ژمنتیا ورته ولري.
هغه زیاته کړه: هغه څوک چې په دې وزارت کې مسوولیت په غاړه لري، مکلف دی چې صادقانه خدمات وړاندې کړي. دا یو الهی امر دی چې په پوره ایماندارۍ سره خپل کار وکړو او دا عزتمند ملت له غربت او اقتصادي ستونزو وژغورو.
د غونډې په پای کې ټولو مسوولینو ته لارښوونه وشوه چې له غفلت څخه ډډه وکړي او د خدمتونو په وړاندې کولو کې صادقانه هلې ځلې وکړي.
