د کانونو او پټرولیم وزارت رهبري هیئت د ایران له سفیر لوړپړو چارواکو او پانګوالو سره ناسته

د کانونو او پټرولیم وزارت سرپرست شیخ الحدیث شهاب الدین دلاور د سه شنبې په ورځ د 18/7/1402 نېټې د مرستیالانو، رئیسانو په شتون کې د ایران له سفیر ښاغلي احمد حسن کاظمي قمي، لوړ پوړو حکومتي چارواکو او د خراسان رضوي ولایت له پانګوالو سره د کانونو او پټرولیم وزارت د غونډو په تالارکې ناسته ترسره کړه.
د کانونو او پټرولیم وزارت سرپرست د ایران سفیر او ورسره مل پلاوي ته د ښه راغلاست ترڅنګه وويل: افغانستان او ایران دوه ګاونډیان او وروڼه دي او زیات مشترکات لري، له همدې امله د واړو هېوادونو اړیکي له یوبل سره نزدې او د متقابل درناوي په اساس ولاړې دي، چې له کلونو راهیسې د میلیونونو افغانان کوربه دی او ګډ دیني، فرهنګي او ژبني مشترکات لري.
د کانونو او پټرولیم وزارت سرپرست د افغانستان اوسنۍ وضعیت د سولې نمونه، په ټول هېواد حاکمیت او سرتاسري امنیت شتون د پانګونې لپاره په ځانګړې توګه د هېواد د کانونو په برخه کې د پانګونې لپاره مناسب وګاڼه، او له هغوی څخه یې وغوښتل چې له شته فرصتونو څخه ګټه واخلي د کانونو او نورو برخو کې پانګونه وکړي.
د ایران سفیر د کانونو او پټرولیم وزارت د رهبري هيئت له مېلمه پالنې مننه وکړه، په پیل کې د هرات ولایت زلزله ځپلو ته د تسلیت مراتب وړاندې کړل او له هغوی سره یې خپل خواخوږي څرګنده کړه ویې ویل: ایران او افغانستان ګډې ګټې، او ښه جغرافیايي موقعیت لري او افغانستان په اسلامي هېوادونو کې هغه هېواد دی، چې له ایران سره ډېر مشترکات لري او موږ ټولې اړیکې له یاد هېواد سره ټېنګي او دوام داره ساتو.
او همدارنګه د هېواد د کانونو د استخراج په ټولو برخو کې په ځانګړې توګه د کانونو داستخراج په برخه کې د لازمو وسایلو برابرول، افغان متخصصینو ته د زده کړو زمینې برابرولو په برخه کې ډاډ ورکړ.
په پای کې د کانونو او پټرولیم وزارت سرپرست د ایران هېواد له همکاریو مننه وکړه، او د دواړو هېوادونو ترمنځ یې د ګډو همکاریو سوداګرۍ او پانګونې په برخه باندې ټېنګار وکړ.